環球管家My Home Manage

呢幾年大家都好鍾意去去泰國旅遊，無論係去行街買嘢定係去海島渡假放鬆自己，泰國總有好多驚奇嘅地方可以令人不斷去發現嘗鮮，泰國都因為天氣太熱，所以好多地方都可以見到咖啡店，而大家都習慣去唔同嘅咖啡店，去吹冷氣度過成個下晝。

但而家只係賣咖啡、賣蛋糕就唔夠吸引了，所以有好多業者開始開設動物咖啡店，喺曼谷就有一間非常特別嘅咖啡店，因為裡面嘅招牌就係有哈士奇！相信大家一定會好驚訝話，哈士奇唔係應該喺寒帶國家生存咩？點會將哈士奇養喺泰國呢種好焗嘅地方呢？所以喺照顧哈士奇呢方面，老闆都可以話係特別比心機去照顧呢啲得意嘅大型哈士奇！所以成立呢間咖啡廳Truelove cafe @ Neverland Siberians，唔單只係業主自己鍾意，都一齊幫埋鍾意哈士奇嘅朋友謀福利呢！！！

入場費係每人：350泰銖（大人小朋友都一樣）
餐單：有英文/泰文兩種版本，嗌完嘢食到前台埋單就得㗎啦
350泰銖係包括同20幾隻哈士奇相處一粒鐘嘅時間，同埋任揀一份甜點同嘢飲！
相信呢啲對哈士奇迷嚟講根本超抵啊。

入去之後佢嘅票卷上面會有藍色鞋套嘅票卷，係比你入去同哈士奇玩時，
需要著上藍色鞋套嚟保護呢啲得意嘅哈士奇，都可以令你哋無憂地同哈士奇玩。

再著上鞋套之後就可以等哈士奇出嚟陪你哋玩啦

其實哈士奇喺泰國呢啲好熱嘅地方，業主為咗不比佢哋感覺到燥熱，都會喺水裡加上好多冰，
亦都會喺樹上同地上放好多電扇，比佢哋涼爽啲。

基本上呢啲哈士奇只要陪完客，就會返到佢哋間房休息了
唔好睇小佢哋間房，老闆為咗佢哋，都落重本比佢哋住喺冷氣房呢！！

呢間咖啡店不算喺曼谷嘅鬧區，呢間位於文青咖啡店多嘅BTS Ari 站附近，再由Phahon Yothin嘅五巷行大約15分鐘就到了。

鍾意哈士奇嘅朋友，千祈唔可以錯過呢間哈士奇天堂嘅咖啡店，
呢間哈士奇咖啡店都係泰國曼谷唯一一間嘅哈士奇咖啡店。

營業時間：星期二到星期日12:00-16:30
（哈士奇開放場次12:30/15:30，特別注意需開場前30分鐘到場）

地址：153 Soi Ari Samphan 2, Phaya Thai Khet Phaya Thai, Krung Thep Maha Nakhon 10400, Thailand

電話： +66 85 908 2777